`k Wil joe wat vertell`n mor dat is aigenlijk gehaim.

Joe harrn ons hoast mit mekoar ien Amerikoa zain.

‘t Is dat joe hier nou benn` veur Klaas en Stien,

en vanzulf ook `n beetje veur ons en Anton en Sien.

Wie harren grootse plannen mit mekoar.

‘k Zal joe vertell`n  van hou, wat en woar.

 Wie woll`n nait  mit boot of vlaigmechien,

mor mit`n raket, doar kinn`wie abmoal ien.

`t Gait ook nog gauwer, en vlaign is zo algemain.

En wie kenn`der ja nait komm` mit bus of train.

Mor zo`n koppel minsen, dat weegt der ien

en `t is vanzulf gain vlaigmechien.

Dus gain grode koffers mit aan boord,

doarover viel nog nait `t leste woord.

Want vrouwluu woll`n vanzulf all`doagn wat anders aan,

dus dei kwamm`mit grode tassen aan.

Raket ston kloar. Mor woar was chauffeur?

Wel, hij ston glundernd ien open deur.

Broer Oosterloo zee: “Dat dou ik wel eev`n,

want ik rie alle doagn laangs `s Heern weegn”.

Sien Bol begon te zing`n van Happy Birthday

en as tweide stem heurden wie Bé.

Ynskje zat nog plat op gat ien`t gras,

ik zag nog net: ze har braien ien tas.

Sien van Sjak har `n onderonsje mit bruier Jo,

op verjoardoagn gait dat ook maistal zo.

Zo`n raket is nog morzo nait ien lucht.

Pilke zag d`r slim tegenaan en lait `n daipe zucht.

His wol wel groag, dat kon je zo wel zain.

Mor Matje zee: “Konn wie mor mit train!

Ik ken nait over dichte deurn, den wor`k benauwd”

“Stil toch!” zee Klaas ïk goa mit. `k Bin ja mit die trouwd!”

Haarm, dei alles van fiets`n en autopett`n wait

zee: “Beter maark as dit ding is d`r nait!”

`k Wer dou wel wat rustiger, dat kin`k wel zeg`n,

en duufde mien haand d`r ook al eev`n op te leg`n.

Bouk har oet veurzurg `n dikke trui aandoan.

“Och wicht” zee Sjouk “wie gonn’ nait noar de moan!”

Dik en Trijn had`n `n raketvers mokt veur astronauten,

dei wie nog el eev`n leern mouten.

Klaas en Stien mochten `t eerst ien raket

en wern ook goud ien blomkes zet.

Ze benn jaa gauw `n golden poar

en holln nog altied halle veul van mekoar.

Jo leup mit verbandtrom onder aarm, veur `t geval

d`r wat gebeurde, joe waitn `t jaa al.

Fokje heur baide aarms -ze het nait meer-

waarn stukkend lest op `n keer.

Kado`s wolln wie ook mitneem`n veur joe,

mor dat wer `n halle kloe.

‘t Mot nait te groot weezn en nait te zwoar,

krieg dat nou mor ais veur mekoar.

Ik zee: “Wie neemn zolde herens mit!”

Dat wer veul te veul gestink ien cockpit.

Sjak stelde pootboon`veur of blommezoad.

Och dat klonk nog nait zo kwoad.

Snieboon`mit worst lussen ze ook halle groag,

mor wel het dr nog `n sniebonenpot vandoag.

Joop zee: “Ik tik `n tweidehands bouk op kop

over `t Grunningerlaand en knap hom op”.

Al is hai gain Grunninger en sprekt Nederlands,

dei jong is toch wel hal wat mans!

Jan Bol wol nog geern eevn noar library tou,

en hoaln `n leesbouk veur Sien, zien vrouw.

Haarke zee: “Gain flaauwekul, abmoal ien raket!

Tou Broer jong, geef hom `n zet!”

`t Zol net weezn mor, ho mensn, ho!

Wie missen nog Heero en Co!

Nog net op tied, doar kwam`n ze aan

en ruipn van ver: “Wie had`n pieper aan,

dou ging telefoon. Oet Amerikoa gebel.

Stap mor weer oet, den verteln wie `t joe wel”.

Wat `n toustand mit dat Oosterloo en Schoonveld gemix.

Was den alles haldal west veur niks?

“Ze komm hier!”, ruipn ze tegen ons abmoal

en den gonn` wie ien Bunne noar `n grode zoal”.

“Oh, nice!” ruip Sien van Jan. Zai vlucht al voak genog.

Ze was blied dat ze nou een keer hier bliev`n mog.

Och, de maisten waarn blied mit dit bericht

omdat elkenain tegen `n raketrais op zicht.

Wat is dit makkelijk veur ons allemoal,

en wie proaten wat ien ons moudertoal.

Ik hoop dat Joop mie dit nait kwoalijk nimt

omdat hai `t maiste nait verstoan kin.

‘tWas mor wat gezwam en gefantaseer.

Ik docht eevn noa en het was d`r weer.

Ik hol van dizze feestelijke doag`n

en wil nog wel wat aan joe vroagn

ien dizze moderne onrustige tied:

Binn joe vandoag ook zo blied?

Elly Schoonveld

In Bunne voorgelezen